Nú fara túlípanadraumar
Skuggsjár senn
að verða að veruleika
með þátttöku í
5 daga alþjóðaráðstefnu
evrópskra draumasetra
og draumastofnana
sem hefjast mun
í Rolduc í Hollandi á
Jónsmessu 24. júní nk.
Sjá nánar á www.iasd.org

Mun Skuggsjá bæði
verða með kynningar á
starfsemi setursins
og erindi um draumahefð
 Íslendinga fyrr og nú.

Segjum hér til gamans frá
túlípanadraumi Dídíar
sem fram kom á nýliðnum
veðurfundi Veðurklúbbsins
á Dalbæ í lok maí sl. 
En vonandi er júníhretið
sem klúbburinn spáði
í kringum 10. júní,
nú að ganga yfir landið
á næsta sólarhring
og gerir ekki skaða.

Draumur Dídíar var
á þá leið að henni
fannst hún koma
að gylltum stiga sem
lá hátt upp og er
hún fór stigann,
kom hún þar sem
salarkynni voru öll
gyllt og björt.
Á einum veggnum
var málaður
hár túlípani,
líkt og yfirskyggður
gullslikju og bar eitt
fallegt blað og sterkt.

Er Dídí vaknaði
af þessum einstaka draumi,
leið henni mjög vel
og hafði á orði að sjaldan
hefði sér liðið jafn vel
af draumum næturinnar.

Þennan draum
má flokka sem djúpan
andlegan draum
sem er táknrænn fyrir
sálræna umbreytingu
og tengingu við
æðri vitundarsvið
án þess að fela
endilega í sér forspá.

En á ráðstefnunni
í hinu fornfræga hollenska
miðaldaklaustri Rolduc,
verður sérstakur dagur
- Pastoral Day -
haldinn 25. júní.
Dagur helgaður
andlegum draumum
og mikilvægi þeirra
í lífi nútímamanna
á því yfirgangsskeiði
sem ríkir í trúmálum
og menningu samtímans.

Leiða má getum að því
að á umbrotatímum
í mannkynssögunni,
séu það draumarnir
sem fólkið leitar til
eftir dýpra innihaldi
og merkingu;
þeir opni á nýja
hugsun og skilning
og leiðina áfram.

Þekktir eru djúpir
andlegir draumar
sem kölluðu fram
gagngera umbreytingu
á lífi og köllun
höfunda allra helstu
trúarbragða heims.

'