Draumasetrið Skuggsjá


27.06.2023 Svefn og dreymi í Dýrafirði og flæðandi hjörtu...
	Nú er Sólmánuður hafinn en hann hefst í 9. viku sumars, oftast á bilinu 18. -24. júní. Grasaferðir voru algengar á þessum tíma og sum grös til matar, drykkjar eða lækninga, ráðlagt að tína fyrir 21. júní, Sumarsólstöður eða 24. júní, Jónsmessu. Það er sannarlega ákveðið streymi, flæði í náttúrunni og lífinu öllu í Sólmánuði en við upphaf hans má heyra dýr tala og velta sér upp úr dögginni og öðlast bæði heilun og skyggni, segir þjóðtrúin. Og:flæðandi hjörtu geisla gleði og nýrri von. Ljósar nætur--Light nights-- vð fagran Dýrafjörð, gefa lífinu við yzta haf dulúð og dreymi, En í allri birtunni hvar ekkki sjást skil dags og nætur, kemur gjarnan óregla á svefn og glíman á daginn getur einkennst af vissu svefnleysisástandi. Dagur Sjösofenda rís við fuglasöng og mjúklátt ölduvagg. Gott að heita á þá við svefnleysi m.a. og ráða í veður næstu vikur en sunnar í álfunni þótti veður á Sjösofendadegi,segja fyrir um veður næstu 6 vikur á eftir. Sjösofenda er þó helst minnst sem andans manna í frumkristni og boðbera nýrrar hugsunar um líf og dauða: að lífið haldi alltaf áfram og möguleiki sé á lífi eftir dauðann. Sjösofendurnir voru grísk ungmenni sem sváfu í nær 200 ár á meðan ofsóknir gengu yfir á hendur frumkristnum. Þegar þeir vöknuðu, var þjóð þeirra orðin kristin og,gátu þeir sagt frá dvöl sinni í svefn-og draumheimum. En að því loknu, lögðust þeir aftur til svefns og sofa nú sælir um alla eilífð. Suður-kóreska skáldkonan, Choi-Seung Ja, (1952-), er ein kunnasta ljóðskáldið þar í landi. Landar hennar hafa dvalið um skeið við listsköpun, skriftir ofl. í Dýraafirði, nánar tiltekið í Blábankanum á Þingeyri sem er nýsköpunar- og samfélagsmiðstöð svæðisins. Þangað hafa komið einstaklingar af mörgum þjóðernum og davlið til lengri eða skemmri tíma. Í ljóðinu Til þín, yrkir Seung Ja um flæðandi hjörtu: Flæða hjörtu auðveldar en vindurinn ég snerti enda greina þinna Fljótlega fer ég inn í hjarta þitt Ég vil vera auga fellibylsins sem deyr aldrei #
	Meira >>


24.05.2023 Leika sér þar lömbin smá - og draumasafn Öxndælings
	Íslenska sauðkindin hélt lífi í landanum í gegnum aldirnar Tákn um tryggð og fórnargjafir. Vorið góða grænt og hlýtt, (þó býsna misjafnt eftir lands- hlutum þetta árið), lyftir svo sannarlega sál og sinni þessi björtu dægur þegar skil dags og nætur flæða í eitt gangverk. En við tökum mörgu sem sjálfsögðu, minnust of sjaldan flókins hlutskiptis bóndans eins og þegar kemur að því að skera lambfé að hausti. Gefum okkur að þetta lærist og venjist. Svo er þó alls ekki alltaf og sumir eldri bændur hafa á endanum hætt sauðfjárrækt vegna þessa. Í stað þess að harðna, hafa þeir orðið meirari með aldrinum og ekki lengur treyst sér til að sjá á eftir fé sínu til slátrunar. Nú hefur einn af velunnurum Skuggsjár kvatt þennan heim. Einstakur draumamaður sem brá búi á sínum tíma og flutti á mölina. Seinni hluta starfs- ferilsins vann hann með bíla og vélar og voru bílar og/eða kindur tíð þemu í draumum hans. Algengir veðurdraumar voru að dreyma hvítar kindur saman sem vissi á snjókomu. Það að dreyma að hann væri að rýja fé, gat vitað á góðan ábata, eða sjá kindur á beit, að ákveðin mál myndu leysast vel. Nokkru fyrir andlátið, hafði hann fært Skuggsjá draumasafn sitt að gjöf. Viðvörunardraumar eru gjarnan tengdir rauða litnum og það að dreyma endurtekið sama drauminn af látinni og kærri frænku koma brunandi á fagurrauðum bíl inn á bílaplanið hans og staðnæmast þar, var etv draumtákn sem rættist. Forboði að eigin andláti, ekki löngu eftir að hún sjálf hafði fallið frá. Komandi að sækja hann. Á slíkum draumum sést mikilvægi þess að segja frá draumum sem koma endurtekið og hreyfa við okkur og einnig að skrá þá. Þar sem háir hólar, hálfan dalinn fylla, kvað Jónas um æskuslóðir sínar í Öxnadal. Með hverju árinu, er dalurinn að taka æ betur við sér og gróa upp með ægifögrum Hraundröngum og tignarlegum píramídanum--Þverbrekku- hnjúknum--, sem framvörðum. Ekki að undra að slíkt sjónarspil Náttúrunnar, skapi búendum líkt og nýlátnum velunnara Skugggsjár, dýpri sýn á allt sem er. Fóstri draumlyndi og draumgáfu sem þeir hafa hlotið í dýrmæta vöggugjöf. Við rætur þessara mögnuðu fjalla/fjallgarðs,hvíla bæirnir Hraun og Háls. Í Vorvísu Öxndælingsins frá Hrauni, Jónasar Hallgrímssonar, (1807-1845), segir m.a.: Ærin ber og bærinn fer að blómgast þá. Leika sér þar lömbin smá. Hjartans þakkir fyrir draumana og velvildina, SKÁ frá Hálsi! Blessun fylgi nýrri vegferð. #
	Meira >>


09.04.2023 Páskar: að sjá draumadísina í svefni værum
	Páskar við yzta haf boðandi fögnuð vorsins og mildina miskunnandi í mannheimi. Skáldið, þýðandinn og rektor Lærða skólans, Steingrímur Thorsteinsson, (1831-1913), yrkir um þá mildi og miskunn sem draumadísin færir hryggri sál með sínum elskuríka anda: þeim sorgin sætast gleymist er sólhýrt bros þitt sjá. Kynslóðir íslenskra barna eiga Steingrími margt að þakka með þýðingum hans á Þúsund og einni nótt og Sögum og ævintýrum H.C. Andersen. Svo yrkir Steingrímur um draumadísina: Í svefni ég sé þig værum, þitt svífur fleyið dátt á sævi silfur skærum við sætan hörpuslátt. Konseptið um draumadísina lifir með þjóðinni og skilningurinn á þeirri blessun, hugsvölun og endurnýjun sálar-og líkamskrafta sem svefn og draumar geta veitt. Og er öllum börnum nauðsynleg til vaxtar og þroska. Ófá börnin hafa fyrst komist í kynni við fjarlæg lönd og álfur, aðra menningarheima við lestur sagnasafna á borð við Þúsund og eina nótt.Látið sig dreyma um heima og geima. Safnverkið er talið sett saman á 8. til 9. öld og er m.a. sótt fanga í sögnum frá Indlandi, Persíu. Sýrlandi, Arabíu og Egyptalandi, Sagnirnar taldar frá fornöld og miðöldum. Hver kannast ekki við sögurnar af Ali Baba, Aladdín og töfralampanum, og Sindbað sæfara? Und friðar björtum boga þú birtist mér í dúr. Sem sól ég lít þig loga er laugar sumarskúr. Njótið gleðilegra páska í draumsins friðarró. #
	Meira >>


21.03.2023 Vorbirtan unga vitjar eftir draumskyggða vetrarnótt...
	Jafndægur á vori boða nýjan tíma og nú verður dagur lengri en nóttin. Nýtt tungl rís, og þrátt fyrir kuldabola heimskautaloftsins, heldur lífið sína rás og vorbirtan unga vitjar eftir draumskyggða vetrarnótt. Frost fór í mínus 21 gráðu að Torfum í Eyjafirði í gærnótt. Og 18 mínus gráður um hádegisbil út við vitann á Svalbarðseyri við svarbláan blikandi sjógang. Sólbjört vorjafndægur við yzta haf, Kaldbakur snjóhvítur og hreint konunglegur. Á tímamótum í Náttúrunni líkt og nú, er talið að draumar gangi mönnum ljósir og lifandi. Svo var um næturdraum um fílana þrjá að leik í drifhvítum snjónum --einn stór og tveir ungar--,og sjalið sem minnti á blómumsetta og litríka mosabreiðu sem varpað var yfir þá til þess að verja bitrum frostkuldanum. Já, það er að koma vor og vonandi kemur gróður vel undan vetri. En þrír fílar í íslenskum snjó? Fíllinn er löngum tákn trygglyndis, ástríkis í garð afkvæma og hjarðar, þolgæðis, góðs minnis og gáfna. Og þrír fílar saman víða gæfumerki. Kannski eru fílar í íslenskum snjó, tenging til Austurlanda fjær og þá einkum Kína, Indlandis og Indónesíu þar sem Skuggsjá hefur sinnt rannsóknum og nú síðast á Balí hvaðan einn aðstandenda Skuggsjár er nýkoiminn. Verður meira af slíku þegar fram horfir. Að dreyma fíl/fíla gjarnan talið tákna vekgengni í viðskiptum og verkefnum. Nú eru Indónesar að sigla inn í nýtt ár skv. þeirra tímatali með sex daga hátíðahöldum og fagna fyrsta degi nýs ár--Nyepi--á morgun, svokölluðum Degi þagnarinnar. Fílar víða í Asíulöndum hafa misst allt að 60-70% heimkynna sinna vegna landbrots manna til búsetu eða nýtingar lands til teræktunar og gúmmívinnslu til að mynda. Stofninn hrunið og þeir í útrýmingarhættu. Verndarsvæði hafa verið sett upp, s.s. á Balí. Hvað sem líður draumtúlkun, draumvitundin er mögnuð í sínum sjónarspilum! Veturinn hefur markast af óvægnum hristingi á heimsmyndinni; stríðsbrölti. Jafnframt skerpt á fókusnum um hvað er hvurs virði í veröld fánýtis og hégóma. Þversagnir úti um allt og heimsmyndin gjörbreytt. Ef þú auðsýnir ekki miskunnsemi, telstu ekki mennskur, áréttaði meistari Meng eða Mencíus,(ca. 372-289 f. Kr.), annar helsti siðspekingur kínverskra Konfúsíusarfræða. Hann taldi þjóðar- leiðtoga afgerandi hverju sinni í framvindu samfélaga, til góðs eða iills. Ábyrgð valdhafa er mikil. Sjúkrahús, skólar og almannarými; börn og almennir borgarar, nú skotspónar eins og ekkert sé. Hlutgerð sem skotmörk. Skáldið Valdimar Tómasson, (f 1971), skrifaði nýlega sína sjöttu ljóðabók og er hún í minningu Vilborgar Dagbjartsdóttur, skáldkonu sem lést í september 2021. JPV/Forlagið gaf bókina út sl. vor: Blástjarna efans. Valdimar yrkir um fánýti heimsins og glámskyggni, þungan nið efa og firringar. Sársauka og brostnar vonir, trú og vantrú á tímum neysluhyggju og tómhyggju; tómlæti. En við seitlandi undirtón svefns og drauma og líkn þeirra Ljóðin tala inn í samtímann og má líkja við lágstemmda en áleitna og marglaga söngkviðu sem hægt er að hlusta á aftur og aftur og finna þar nýjan samhljóm í hvert eitt sinn: Blikar á himni blástjarna efans og hver tunglgeisli ber tinandi sársauka. Harmljóðið dynur í dauðakyrri nótt. Það er vor í kortunum. Kemur í einsemd sem öðru: Þú drottning einsemdarinnar draumskyggða vetrarnótt. Minn tryggi vinur er vetrarsnjórinn. Mín vitjar um síðir vorbirtan unga. #
	Meira >>

Síðasta frétt 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 Næsta frétt

© 2007 Draumasetrið Skuggsjá Hönnun Design EuropA