Forsíđa   
 21.03.2020
 Draumblá vorjafndćgur og dýrđin, dýrđin í skugga Kórónu



Veðurfegurð mikil á sólbjörtum fimmtudegi
við ysta haf þann 19. mars en heyrst hafði
til vorboðans sem kveður burt leiðindin,
lóunnar, nokkru fyrr: dýrðin, dýrðin.
Þjóðtrúin kennir að komi lóan snemma og
syngi dýrðin, dýrðin, sé von á góðu vori
sem komi snemma. Er það óskandi
eftir harðan og langan illviðravetur,
að lóan kveði burt snjóinn.





Nóttina á eftir tóku draumblá vorjafndægur
við þegar tími og rúm heimsálfa á milli mættust
í stafrænum heimi Internets og tölvupósta:
nútíma könnuðir í alheimssamfélaginu
sáu þann kost vænstan að hverfa á braut til
heimkynnanna í norðri, og nú þurfti að afbóka með
hraði, bóka nýtt og endurhugsa sinn gang.
Það þurfti að henda tölvupóstum á milli heimsálfa
til þess að græja svo skyndilega heimferð.
Klukkan var nákvæmlega 3.50 þessa nótt jafndægra
í norðrinu og að nálgast hádegi í Singapúr hvar
íslenski könnuðurinn var staddur að komast í flug til
Evrópu og þaðan til síns heima á Ísalandi, beint í sóttkví.






Hið fágæta og friðaða hreisturdýr--pangolin--og mennsk
ásókn og græðgi sem engu eira, hvorki friðuðu
né öðru, hafði tekið völdin, og kórónuveiran tekin að
geisa án afláts, trúlega komin úr friðuðu hreisturdýri
sem matreitt hafði verið, keyptu á markaði, eða nýtt
í því skyni að búa til læknislyf; vonandi nær veiran ekki
að stökkbreytast til frekari versnunar...
Hættulegustu veirur samtímans koma úr dýrum
til manna, eða svo er sagt, eins og ebólan sem
stökk úr leðurblöku í menn og stökkbreyttist síðan
í enn hættulegri og banvænni legg...
(Sýklahernaður er ein sviðsmyndin, sem Vísindavefur
Háskóla Íslands, dregur upp af tilurð ebólaveirunnar).
Raunar er möguleiki, að það sem sé uppi á teningnum
með hreisturdýrið og upphaflegu smitleiðina í mannfólkið,
sé að dýrið kunni að hafa borið kórónuveiru úr úrgangi,
sem fallið hefur til jarðar frá leðublöku, og sem hreisturdýr
fékk upp í sig þegar það rótaði í jarðvegi eftir æti. Og að
þannig hafi veiran komist í vefi dýrsins, sem síðan var
matreitt og borðað, eða skeljar þess nýttar til lækninga.
Samt vakna margar spurningar eins og af hverju ætti það
að gerast einmitt nú þar sem hreisturdýr til átu er jú ekki
nýtt af nálinni? Breyting á erfðaefni--stökkbreytt afbrigði
kórónaveiru í nútímanum--er einn svarmöguleika.






En hvað vitum við svo sem um dýrin, innra líf þeirra
og hegðun í sinni búbblu? Hvar halda smáfuglarnir
sig--staðfuglarnir--hundruðum saman, á köldum
vetrum þegar þeir sjást ekki heima við bæ, eða
í görðum landsmanna? Hvað vitum við um lóuna?
Þjóðtrúin segir að lóan kunni nefnilega að dvelja í
margra mánaða dvala með vetursetu hér í skjólum
og með birkikvist eða víðisbút í goggi og síðan mæta til
leiks að vori. Snilld! Já, þessi veðurglöggi vaðfugl veit
lengra nefi sínu hvort sem lóan fer, flýgur langflugið til
Bretlandseyja til vetrardvalar og flýgur síðan að vori
um heiðloftin blá til landsins kalda, eða þykist fara
en er bara allan tímann hér heima í felum...
En, já, nú eru villt dýr sem áður voru étin af gráðugu
mannfólki, alfriðuð í Kína eftir þessa hræðilegu og
hættulegu útbreiðslu banvænnar kórónuveiru,
Covid-19, sem er að gjörbreyta kerfum manna
um veröld víða.





Hver hefði séð þessi geigvænlegu umskipti
fyrir á örskotsstund nema Náttúran sjálf?
Heimurinn er gjörbreyttur og nú skiptir traust,
tiltrú á mennsku og mildi og samstaða
innan þjóða og milli þjóða, réttar upplýsingar og
vísindaleg þekking, öllu, til þess að takast
á við það sameiginlega verkefni að hindra frekari
útbreiðslu og þróa bóluefni, bjarga mannslífum.
En hvað verður ofaná, samvinna eða sundrung,
mun tíminn leiða fram. Vonum það besta.
Eitt er ljóst, loftmengun hefur minnkað snarlega
nú þegar dregur svo um munar úr ferðalögum
á lofti og láði. Og fólk þarf að búa við sjálft sig
og aðra, sama hvað.

Margir tala um aukið draumflæði nú þegar það er
nær sjálfu sér og sínum nánustu, er meira heima
og hefur þurft að hægja á sér.



Segir svo hjá meistara Konfúsíusi:



Hvert sem leið okkar liggur,
ferðumst við með okkur sjálf.




#
Meira >>
 14.02.2020
 Sálarkortiđ: Persóna og Skugginn og draumlendur


Í djúpsálfræðinni er leitast
við að kortleggja lendur
sálarinnar, bæði hinar sýnilegri
og hinar duldari sem og
draumheima eins og kemur
vel fram í skrifum Carl G. Jung,
s.s. í the Red Book, og í skrifum
fjölmargra lærisveina hans.
Marie-Louise von Franz, (1915-1998),
var náinn lærísveinn Jung og skrifaði
m.a. um ævintýri og ýmis minni
í þeim, um drauma, alkemíu og
hið heilaga Gral, og beitingu skapandi
ímyndunarafls til þess að byggja
brú á milli hins meðvitaða og
undirmeðvitaða. Hún starfaði
lengi í Zurich við Jung stofnunina
þar og hefur haft mikil áhrif á
leika sem lærða um heim allan,
og voru skrif hennar ákveðið þema
í doktorsritgerð forstjóra Skuggsjár
á sínum tíma.




Á síðari árum, hefur hinn kanadísk
ættaði sálgreinir, dr. Murray Stein,
sem starfað hefur árum saman
við ISAP stofnunina í Zurich--
International School of Analytical
Psychology--skrifað í anda þessara
brautryðjenda og haft mikil áhrif víða
með bókum sínum um duldar
lendur sálarinnar og erkitýpurnar,
arfgerðirnar, sem dvelja í hinni
sammannlegu dulvitund.
Bækur eins og The Bible as Dream
og Map of the Soul - Persona:
Our Many Faces, hafa fengið mikið
alþjóðlegt lof, og komu út á
árunum 2017 0g 2019.




Nýverið kom út hjá Asheville-Jung
Center í Asheville, Norður Karólínu,
og Chiron Publications, önnur
bók Murray Stein, um sálarkortið,
Map of the Soul - Shadow: Our Hidden Self.
Í þessum tveim kortagerðarbókum,
fjallar hann annars vegar um
Persónuna, sem við sýnum út á við
og grímurnar okkar. Og hins vegar
um duldu öflin í undirdjúpum sálarinnar,
Skuggann, sem við viljum oft ekki
gangast við, en eru öllum sameiginleg,
og birtast gjarnan í draumum og
martröðum, jafnvel í ofbeldi og illvirkjum
einstaklinga og samfélaga.
Leggur áherslu á, að það sé ekki
fyrr en við viðurkennum þessa hluta
af okkur, sem við getum öðlast
dýpri sjálfsþekkingu og heilun,
sem síðan gerir okkur fært að
skilja og byggja betri heim.




Suður-Kóreska strákabandið, BTS,
hefur mjög hrifist af fræðum
Murray Stein og sendi frá sér
albúm eftir úkomu Persónu
bókarinnar 2019 og mun nú á
næstu dögum senda annað albúm
frá sér, sem vísar í margt í seinni
bókinni um Skuggann og er
albúmið unnið í náinni samvinnu
við Stein.
Raunar hét fyrsta albúm BTS
frá 2013, No More Dream,
trúir hinni fornu kóresku hefð,
að fjalla um skilin draums og veru.
Það er ekki úr vegi á sjálfan
Valentínusardag, að vitna í
eitt frægasta lag BTS úr fyrra
albúminu, sem hefur fengið
eitthvert mesta áhorf og spilun,
sem um getur á YouTube.
Lagið heitir A Poem of Small
Things - Boy With Luv:






Listen my my bay I´am
Flying high in the sky
With the two wings you gave me back then
Now it´s so high up here
I want you tuned in to my eyes
Yeah you makin´ me a boy with luv
Yeah you makin´ me a boy with luv


---------------

I´ll speak very frankly
Sometimes I was a little shut up
Elevated sky, expanded hall
Sometimes I prayed let me run away
But your pain is my pain
When I realized that, I vowed to myself,
with the wings of Icarus you gave me
Not toward the sun but toward you
Let me fly




#


Meira >>
 01.01.2020
 Ljóshvolfiđ og helgitré á nýju ári plöntuheilsu



Áramótin gengu í garð í
mildu votvirðri og ákveðnum
stillileika veðurguðanna
hér í Norðrinu.Landinn leit
til himins og fagnaði
nýju ári 2020, alþjóðaári
plöntuheilsu samkvæmt
bókum UNESCO.
Hvort það voru marglitir
og háværir flugeldar, sem
fönguðu athyglina, eða
sköpunarverkið og ljóshvolfið,
eða bara allt í bland, skal
ósagt látið.








Hlýlegt og einlægt trjáknús
á ármótum er kærkomið,
bæði fyrir menn og tré...
Við öndum að okkur
súrefninu frá trjánum
og þessir staðbundnu
samfylgdarvinir--sumir
aldagamlir eins og 
reyniviðirnir í Eyjafirði--,
hafa sannarlega orðið vitni
að mörgu í mannheimum
og plöntuheimum.
En margir reyniviðir hér
um slóðir, hófu lífdaga
sína sem græðlingar af
reyniviðnum forna á
Hvassafelli í Eyjafjarðarsveit.
Á þeim reynivið var mikil
helgi og hann því nefndur
helgitré, sem þjóðskáldið
Jónas Hallgrímsson, hefur
óefað haft kynni af í uppvexti
sínum, unglingur á Hvassafelli.







Tré eiga sér sitt líf
innbyrðis og tala
saman og miðla
upplýsingum í
gegnum  ræturnar:
sveppanet í iðrunum
flytur rafboð á milli.
Gerir vart um hættur ofl.
Tré binda líka mikið
vatn og dæla víða.
Margslungnar verur
með persónuleika og
háþróað tengslanet.
Og ef lagt er við hlustir,
má heyra þau tala,
syngja...
Og kannski sjá þau ganga
líka eins og Etnarnir hjá
Íslandsvininum Tolkien!
(Raunar er trúin á talandi tré,
þekkt í þjóðtrú og minnum
um heim allan, langt
aftur í aldir).








Munum að við höfum skyldur
við trjá- og plöntulífið,
sem nú brennur um veröld
alla, í bæði eiginlegri
og óeiginlegri merkingu.
Höfum skyldur við búsvæði
plantna, verndun þeirra og
viðhald en eldar og sýkingar
ásamt land-og/eða ofnýtingu,
verða til þess að plöntur ná
víða ekki að aðlagast og
eru sumar tegundir í hættu
að deyja alveg út eins og
á Amazon svæðinu, þessari
stærstu súrefnisveitu Jarðar.
Nú um stundir verður um
40% allrar mataruppskeru
heimsins, plöntusýklum að bráð.
Þessar hörmungar hafa
síðan áhrif á byggileika,
atvinnu og fæðuöryggi,
að ótöldu því að kunnugleiki
hversdagsins laskast og firrist.







Finnum okkar tré: getum
hæglega gróðursett
okkar tré, eða annarra,
eða styrkt trjárækt með
einum eða öðrum hætti
og þannig kolefnisjafnað
sem mótvægi við eitur-
gufunum í andrúmsloftinu.
Munum að bæði vernda og
hlusta á tónverk Móður
Jarðar í trjám og plöntum
undir fágætri hljómkviðustjórn
ljóshvolfsins á árinu 2020,
nú þegar perlumóðurskýin
--glitskýin--svífa leikandi
í Norðrinu og gleðja sál
og sinni þennan fyrsta dag...






#











Meira >>
 31.12.2019
 Deigla tímans og seigla draumsins um nýjan heim


Enn á ný segir tíminn til sín
og byrjar brátt nýja hringrás,
sama hvort okkur líkar
betur eða verr; raunar höfum
við bara ekkert um það að segja,
Náttúran er við stjórnvölinn.
Afstæði tímans og rúmsins er
hollt fyrir þröngt sjónarhorn vort:
nú klukkan 16 þegar þessi pistill
er ritaður, berst kveðja
úr framtíðinni til árs og friðar,
miðnætti í Suðaustur Asíu,
og nýtt ár runnið upp hinum
megin á hnettinum!




Árið 2019 sem nú kveður,
markar lok heils áratugar
og einkennist um margt af
umróti og ólgu, allt að upplausn
í samfélögum, og minni sem
stærri einingum innan þeirra
og þeirra á millum; hefur á
stundum verið martröð likast.
En friðarviljinn er lífsseigur,
og víða er frábært mannúðar-
og hjálparstarf unnið eins og
við hér á Fróni fengum
sannarlega að reyna í
nýliðnum náttúruhamförum.




Hamfarahlýnun, og einhverjir
mestu þjóðflutningar í sögunni,
ásamt stafrænu byltingunni,
munu umbylta samfélögunum
eins og við þekkjum þau; þessi
þróun er að verða æ skarpari.
Aftur er það Náttúran sem
lætur ekki að sér hæða en
það vald sem Herrar Jarðar
hafa tekið sér, gæti, ef fram
heldur sem horfir, leitt til enn
frekari hörmunga, eyðileggingar,
endanlegs hruns vistkerfa og
fjölbreyttra menningarheima.




Sömuleiðis, er hættan af hningun
mennskunnar mikil, og af því
refsileysi, (impunity), lygum og
falsi, sem víða ræður ríkjum.
Það að telja sig komast upp
með allt, og raunar gera það,
sýnir að mannfólkið hefur glatað
sjónum á sín leiðarljós; margir
taka þetta mynstur sem gefnu,
sjá sér jafnvel hag að því, eða
gefast upp fyrir ofureflinu, og
hver reynir að bjarga sér.
Víða hættulegir einstaklingar
við stjórnvölinn, sem þrífast
í slíkum jarðvegi, hafa átt
sinn þátt í að skapa hann,
viðhalda og stjórna.
Að ótöldu hermanginu...
Eignasamþjöppun og
ójöfnuður hefur aukist.




Þjóðirnar tala gjarnan um
manngæsku, mildi og trúna
á réttlátan framgang mála,
dharma--fairness of conduct--,
sem gunnstoðir samfélaganna,
og slá varðborg þar um.
En getur ríkjandi eitrað mynstur
valdníðslu, græðgi og mismununar,
nokkuð annað en endað með
ósköpum svo andstætt sem
það er lögmálum þróunarinnar
og lífsins sjálfs?





Tíminn gefur svörin,
segir gömul speki.
Og svörin eru oft margræð
jafnvel óræð. Hver hefði
t.a.m. trúað að Asperger
unglingsstúlka myndi
hrista jafn vel upp í heims-
byggðinni og raunin er,
og fá ungt fólk um heim
allan til liðs við málstað
Jarðarinnar og vernd
hennar og viðhald?
Minnir á hið óræða og
undursamlega skapandi
afl drauma sem geta
umbreytt bæði manni
og öðrum ef á er hlustað.




Í stóra samhenginu hvað
heimsbyggðina snertir,
--m.a. vegna alþjóða-
samvinnu og viðskipta--,
hefur dregið úr ólæsi,
barnadauða, fólksfjölgun,
og sárustu örbirgðinni.
Menntun kvenna sækir
á, og heilbrigði er betra.
Já, það er deigla og
seigla í gangi, sem er
að fleyta okkur inn á
nýjan áratug á vit nýrra
vona og drauma þar sem
miklu skiptir að dreyma
saman um betra lif til
handa Plánetunni og öllum,
sem hana byggja. Á ferð
Jarðar í samfélagi stjarna
og vetrarbrauta á hverjum
merkar uppgötvanir eru
að eiga sér stað sem munu
óefað kollvarpa ríkjandi
heimsmynd.
Nýr draumur...




#
Meira >>
Síđasta frétt  1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  Næsta frétt 
© 2007 Draumasetriđ Skuggsjá Hönnun Design EuropA