Hestar hafa fylgt
mannkyni allt frá
árdögum menningar.
Er talið að þeir
hafi fyrirfundist á
öllum meginlöndunum
og er hesturinn álitinn
það dýr Jarðar sem
mestan þátt hefur átt í
útbreiðslu siðmenningar
um heimsbyggð alla
sem bæði  fararskjóti
og þarfasti þjónninn.

Í draumhefð Íslendinga
og margra þjóða eru
hestar í draumi mjög
kunnug draumtákn
hjá bæði börnum og
fullorðnum og skiptir þá
litur hestsins miklu máli.
Best er að dreyma
hvítan hest eða gráan
- fyrir gæfu og andlegu gengi -
en öllu verra að dreyma
svartan eða bleikan
- fyrir erfiðleikum,
svartsýni eða dauða -.

Maður og hestur bindast
oft varanlegum tryggðarböndum
eins og lýst er í eftirfarandi
lausavísu Páls Ólafssonar:


Aldrei sofna ég sætan blund
svo mig ekki dreymi
að litli Rauður litla stund
lifi í þessum heimi.


Þekktustu dýr sem
draumtákn eru ekki
einungis hestar, heldur
 líka húsdýr eins og
hundar og kettir.
Margar hugmyndir um
túlkun hafa komið fram.
Í þjóðtrúnni eru það helst
eðliseinkenni hvers dýrs
fyrir sig sem litið er til:
skerpa, þróttur og
úthald hestsins,
tryggð og hollusta
hundsins, lipurð
og lævísi kattarins.

Í þessum sama anda
ritaði Jung um erkitýpurnar
í sammannlegri undirvitund
en hestur, hundur og köttur
voru meðal 20 helstu
erkitýpanna að hans mati.

Hestur sem draumtákn
getur staðið fyrir frelsi, kraft,
vilja, þol, hreyfingu,
framfarir, ferð, takmark,
frumeðli, tilfinningar og þrár.

Huganum er gjarnan
líkt við óbeislaðan hest;
huganum hættir til
að fara út um víðan völl.
Eins og með kraft hestsins,
þarf að hemja hann og beisla.

Öll draumtákn eru margræð
og eiga sér fleiri hliðar:
óbeislaður kraftur getur unnið
bæði manni og dýri tjón.
Hið sama má segja um
ofuráherslu á hið beislaða.
.
Seinni tíma draumfræðingar
leggja áherslu á samhengi
draumsins og þá tilfinningu
sem fylgir honum og tengslin
sem dreymandinn hefur
við tiltekin dýr í lifanda lífi.
Og þá samsvörun
við líf og líðan sem
dreymandi getur fundið.

Dreymi ykkur vel
á ári Hestsins!


*