Á fullu tungli gærdagsins,
svokölluðum ofurmána,
(frostmána; sorgarmána,
líkt og Indíánar BNA
eða Keltar nefndu það),
snjóaði drjúgt hér nyrðra.
Og nú á Degi íslenskrar tungu,
hvílir snjóbreiða hvít og hrein,
yfir öllu. Fyrsti alvöru snjór
þessa vetrar. Kannski við
sjáum Norðurljós og stjörnur
við frostmarkið...
Skírdreymi er einn flokkur
drauma sem nú er verið
að rannsaka enn frekar.
Hreinn tærleiki náttúrunnar
eða skírleiki nú um stundir,
á sér samsvörun í draumum
næturinnar þegar dreymandi
upplifir sig að vera skír eða
vitandi um að vera að dreyma.
Getur horft á drauminn og
velt fyrir sér eða jafnvel breytt
framvindu hans. Hafa sumir
náð að breyta erfiðum draumum
og draga úr ógninni frá þeim,
með því að skoða nýjar leiðir
til þess að vinna með hættuna
í draumi/um í slíku ástandi.
Ennfremur hefur bæði lista-
og vísindafólk talað um
skapandi flæði í skírdreymi
sem þeim tekst svo að fanga
til nýrra verka í vökunni.
Alþingiskosningar í nánd;
fyrir margt löngu hefði þó verið
hægt að færa margt til betra horfs
með endurskoðun og uppfærslu
laga í takt við nútíma lýðréttindi,
s.s. varðandi vaxtalög og kafla
um okur í gömlum refsilögum
frá því í kringum 1960.
Eða skoða möguleikana á
að festa gengi krónu við annan
og stöndugri gjaldmiðil án þess
að þurfa að ganga í einhver sér
bandalög sem einkum eru sniðin
fyrir ríki á meginlandi Evrópu.
Kanadabúar buðu Íslendingum
t.d. aðstoð í Hruninu en á þeim
tíma var kanadadollar talinn einn
styrkasti gjaldmiðill í heimi.
Hvort sá möguleiki var tekinn
til skoðunar, er til efs.
Löngum hefur verið bent á
að taka þurfi tiltekna kafla
stjórnarskrár til endurskoðunar
eins og forsetakaflann en
látið reka á reiðanum svo og
margt varðandi kosningar
eins og atkvæðamagn á bak
við hvern þingmann.
Í þessu ljósi m.a. er engin
furða að margir hafi litla trú
á raunhæfum beytingum
sem skapað gætu eðlileg
og streituminni skilyrði til
heilbrigðs lífs og búsetu
í landinu.
Landið okkar gefur þó skíra
von um góða hluti þrátt fyrir
allt. Mörg eru góðu gæðin.
Megum ekki gleyma að
margt er bæði vel gert hér
og til hagsbóta fyrir alla.
Munum eftir skyldum okkar
við landið og skírum vonar-
draumum í svefni sem vöku:
að halda tryggð við landið
sem okkur hefur verið fengið
til fylgdar.
Auðsýna mildi og elskusemi
í mannlegu samfélagi:
Ó dunandi eyja
sem á dögum sköpunarinnar!
ennþá í smiðju
elds, kulda og vatns
engan stað á jörðu
eigum vér dýrari
því þetta land
var sál vorri fengið til fylgdar.
(Hannes Pétursson. Óður um Ísland.
Heimkoma. Helgafell,1974).
#
| 
