Dögun nýs árs 2024 hefur risið
og glóey sendir geisla sína
frá upphimni. Það birtir hægt
og hægt og sólin--glóey--,
gleðinnar móðir, hækkar á lofti.
Já, hænufetið er býsna drjúgt.
Megi nýja árið færa heimsbyggð
langþráðan frið frá stríðsböli og
illvirkjum misviturra manna.
Heimsbyggð sem er í sárri þörf
fyrir góða leiðtoga--mannvini--
og sem illu heilli er víða stjórnað
af hættulegum siðblindingjum.
Okkur virðist vanhaga um úrræði,
vitrænar og lagalegar lausnir,
tólin til að bregðast við hryllingnum.
En þessi sjokkþerapía sem valdhafar
beita víða, mun gefa af sér andsvar.
Megi mannleg snjallhugsun, elska
og elja gefa af sér rétta viðbragðið
og snúa heimi af heljarbraut.
Hér heima er stóra verkefnið
að vinna að knýjandi lausnum
á mörgum sviðum samfélagsins,
ekki síst hvað varðar fátækt barna.
Skammarlegt að um 10 þúsund
börn búi í gjöfulu landi við fátækt.
Það að kyrja eins og einhverja
möntru að þetta eða hitt séu
áskoranir, leysir ekki verkefnin
í sjálfu sér.
Ekki frekar en tvísýna stöðuna í
eldvirknikerfum á Reykjanesi
og öryggisleysi íbúa þar og víðar
á landinu í hamförum náttúrunnar
svo og örmögnun hjálparliða.
Hvar er hjálpin hjálparans, er
stundum haft að orði.
Fleiri hendur þarf á dekk og nú þarf
að forgangsraða fjármunum af mun
meira raunsæi en verið hefur.
Menningar- og framfarastofnun
Sameinuðu þjóðanna,
UNESCO, tileinkar nýja árið
ákveðnum bústofni: hófsömum,
tryggum og harðgerum dýrum af
kamelætt/camelids. Dæmi eru
úflaldar og kameldýr, gjarnan
kölluð skip eyðimerkurinnar.
Hið gleðilega er að á um
tveim áratugum hafa þessi
þrautseigu dýr náð að nær
tvöfalda fjölda sinn í Afríku
og Asíu og telur stofninn
nú um 39 milljónir.
Önnur dýr af kamelætt, eru
lamadýrin og dýr þeim skyld,
s.s. apakkadýr, guanadýr
og vikjánadýr.
Þessi bústofn eyðimarka og
hálenda, hefur reynst uppistaðan
í menningu og lífsafkomu
þjóða og þjóðarbrota víða
um heim, líkt og kindur,
nautgripir og hestar hér á
Norðurhjara.
Gefa af sér mjólk, kjöt, ull,
klæði og skæði, og sum bera
bæði fólk og vörur á milli
staða og samfélaga.
Traustir reiðskjótar, bæði
úlfaldar og kameldýr sem ekki
skyldi að hæðast. Stundum
hent á lofti að þessir meinlausu
grasbítar hafi verið búnir til
úr afgöngum Almættisins!
Verum minnug hógværðar
og þjónandi elju og elsku.
Segir ekki á helgri bók vorri,
Markús 10: 25:
auðveldara er úlfalda
að fara í gegnum nálaraugað
en auðmanni að komast inn
í Guðsríki.
#
| 
